!(© Imajen AP )

Saida mak Obama sira sei halo tuir mai? Husi Deborah Charles - 10 Novembru 2016

Hafoin tinan ualu iha Kaza Branka, Prezidente Obama no nia familia sei prepara

atu haree ba futuru. Maibé sira sei ba ne’ebé, no saida mak sira sei halo?

Maioria prezidente sai husik Washinton bainhira sira nia mandatu hotu ona.

Hafoin sira nia susesor hetan ona tomada de posse, sira sai husi sidade hodi

komesa sira nia moris foun. Maibé, ba tinan hirak tuir mai, família Obama sei

kontinua hodi hela iha sidade Washinton tanba sira nia oan feto kiik, Sasha, sei

estuda hela iha eskola sekundária iha ne’ebá.

Obama koalia halo komik kona-ba nia tama iha merkadu traballu hafoin loron

20 fulan Januariu 2017 – ho halimar dehan katak nia tenki kria konta ida iha

“LinkedIn no hein sá mak sei akontese.”

Iha realidade, susar ituan ba nia hodi hili nia opsaun sira. Uluk nanain – hafoin

intervalu husi deskansa — prezidente no primeira dama Michelle Obama sei

karik hahú hakerek sira-nia memoirs ka livru balu kona-ba tempu ne’ebé sira

hela iha Kaza Branka.

! Joven Afrikanu-Amerikanu rona hela Prezidente Obama koalia kona-ba ‘Inisiativa ha’u nia Maun-alin

Hakiak nian’. (© Imajen AP nian)

Obama nain rua iha possibilidade makaas sei involve iha servisu filantrópiku,

karik hamutuk ho Fundasaun Barack Obama no Sentru Prezidensial. No bainhira

nia lansa projetu Inisiativa Ha’u nia Maun-alin Hakiak hodi tulun ema joven kór

sira, Obama indika katak nia sei kontinua envolve-an nafatin hafoin ninia

prezidensia ramata. Maibé lá’os ne’e deit maka nia sei halo.

“Ha’u sei fila fali ba halo servisu sira ne’ebé uluk ha’u halo ona antes, buka

dalan oinsa bele ajuda ema,” Obama hatete ba labarik estudante sira iha tinan

kotuk. “Ajuda ema klosan sira hodi hetan edukasaun, no ajuda ema hotu hodi

hetan empregu, no koko lori oportunidade negósiu ba vijiñu sira ne’ebé ladun

iha negósius.”

! Michelle Obama hakuak grupu labarik sira iha foto ida ne’ebé hasai iha Kaza Branka iha tinan 2015.

(© Imajen AP)

Michelle Obama, ne’ebé deziste husi nia kareira hanesan advogada no ezekutiva

bainhira nia muda ba Kaza Branka, dehan katak nia planeia atu kontinua

envolve-an iha kestaun sira konsentra ba servisu atendimentu. Iha editorial

foin dadauk, nia konsentra liu ba esforsu sira hanesan inisiativa Husik Feto

klosan, ne’ebé ajuda feto klosan sira iha mundu tomak kontinua estuda iha

eskola.

“Hafoin halo viajen iha mundu nudar primeira dama no halo sorumutuk ho feto

klosan barak …. Ha’u lori sira nia esperansa no ambisaun iha ha’u nia laran ba

fatin hotu ne’ebé ha’u vizita, no ha’u planeia atu kontinua ha’u nia servisu lori

sira nia naran … iha ha’u nia moris tomak,” primeira dama hakerek.

Hanesan haktuir iha pájina internet Fundasaun Obama nian, “Tinan ualu ne’e

hanesan inisiu deit.”