OPENBAAR LICHAAM BONAIRE

PERSBERICHT / KOMUNIKADO PA PRENSA Afdeling Communicatie

25.02.2014

MIRANDO BÈK RIBA 2 AÑA TRABOU KOMO GEZAGHEBBER

Kralendijk—Na Novèmber 2011, mi a tuma e desishon di entrega mi solisitut pa e funshon di Gezaghebber na Boneiru. Mi a tuma e desishon aki despues di a deliberá ku mi famia i despues ku mi a puntra mi mes si bèrdat mi ta kere ku mi por ehersé e funshon aki. Mi tin e kustumber di hasi esaki kada biaha ku mi drenta un funshon nobo. Na ingles tin un dicho: ‘beware what you’re asking for, you might get it’. Ora bo solisitá pa un fushon, bo tin e chèns ku bo ta hañ’é . P’esei mi a pensa basta promé ku mi a solista na promé lugá mi a puntra mi mes pakiko mi ta kere ku mi por hasié. Emerencia a konsiderá ku 32 aña di karera profeshonal, ku 15 aña di eksperensia den maneho i liderazgo, ademas di mi eksperiensha internashonal, lo por a duna mi e kapasidat pa fungi komo gezaghebber di Boneiru. Tambe mi a konsiderá mi eksperiensha amplio pa traha den sirkunstansianan difísil i kompliká. Gran parti di mi eksperiensha profeshonal tabata pa duna guia na prosesonan di kambio. Mi a siña traha ku resistensia ku ta algu ku semper bo ta topa ora kambio ta tuma lugá. Pero mas ku tur kos mi tabatin gana di bin Boneiru, siendo e isla ku semper mi tata tabata konta nos storianan largu tokante su historia i su hendenan. Pa tur e motibunan aki, mi a kita di trabou i laga mi kas i famia atras na Aruba pa bin traha pa Boneiru. Mi motivashon pa bin Boneiru tabata grandi i esaki ta konta te dia di awe. Ora mi a huramentá dilanti di representante di reino dia 1 di mart 2012, mi a hura “ku pa mi nombramentu den e kargo òf funshon di gezaghebber mi no a duna ni primintí, ni dirèkt ni indirektamente, bou di ningun nòmber ni denominashon ni preteksto, ningun regalo ni fabor. Tambe mi a hura ku mi no a risibí ni mi no a aseptá, ni lo mi no aseptá, ni dirèkt ni indirektamente, ningun regalo ni ningun promesa di hasi algu o laga di hasi algu den e kargo o funshon en kuestion”. Mi a hura ku lo mi ta fiel na konstitushon, ku lo mi kumpli ku lei i ku lo mi kumpli ku mi obligashonnan komo gezaghebber segun mi konsenshi i honor. Ku Dios Todopoderoso yuda mi. Ku e palabranan aki, mi a ekspresá mi determinashon pa sirbi pueblo di Boneiru, hasiendo mi máksimo esfuerso, kumpliendo ku mi enkargo komo Gezaghebber manera lei ta preskribí i segun mi konsenshi I balornan I semper na manera íntegro, esta di ta manera ku no por kumpra ningun fabor serka mi persona. Mi tabata konsiente ku komunidat ta spera di un Gezaghebber

ku e ta aktua na manera hustu i ophetivo, ku e ta defendé interes di pueblo, a todo kosto, i ku e mester ta e promé pa duna e bon ehèmpel den su komportashon. Sinku punto di lansa For di tempran, mi a disidí ki tipo di gezaghebber mi lo ta. Mi a haña tambe importante pa mi informá for di promé dia ku mi a kuminsá traha, kiko gobièrnu i pueblo por spera di mi. P’esei, den mi promé diskurso den Passangrahan dia 1 di mart 2012, mi a ofresé 5 punto di lansa.

1) Insistensia riba vishon ; E promé punto tabata ‘insistensia riba vishon’. Esaki a nifiká ku mi a trata di stimulá ku kada desishon ku nos komo gobièrnu ta tuma tabata basa riba un motivashon di e pakiko i e dikon. Mi tabatin e kustumber di hasi preguntanan kritiko, tantu den reunionnan di Kolegio Ehekutivo, komo tambe ora trata e diferente dokumentonan ku mi ta haña tur siman pa firma. Semper mi tabata interesá pa haña kua ta e meta ku nos kier realisá ku e desishonnan ku nos tabata tuma. Kon e desishon aki ta afektá Boneiru. Kon e desishon aki ta kuadra ku meta nan di desaroyo nashonal di nos isla.

2) Rèspèt pa dignidat humano; E di dos punto di lansa ku mi a fórmula tabata: ‘rèspèt pa dignidat humano’. Mi a trata di hasi esaki den mi relashon ku tur esnan ku ken mi tabata traha, tratando di ta kritiko, pero alabes respetuoso. Pa mi ta importante ku un gobièrnu ta aktua na manera hustu i digno ku habitante i ku tin protekshon pa derecho humano di kada habitante, no opstante su nashonalidat, su idioma, su preferensianan, òf su kolo polítiko.

3) Afan pa ekselensia

E di tres punto di lansa tabata afan pa ekselensia’. Den e dos añanan ku a transkurí, mi a insistí pa nos hasi nos trabou komo gobièrnu mas mihó posibel. Den práktika esaki a nifiká ku vários biaha mi a manda sierto dokumentonan bek, pa un mihó argumentashon òf mihó splikashon. Esaki no ta pa falta di rèspèt di esnan ku a traha e dokumento, sino pa un invitashon na nan pa kumpli ku standard haltu di kalidat ora nos ta sirbi nos pueblo. Mi a stimulá ku nos ta reflekshoná tokante nos trabou i trata pa hasi adaptashon, unda esaki ta nesesario. Den mi afan pa ekselensia a impliká tambe ku mi a organisá aktividatnan durante kua nos por a profundisá temanan, na manera kritiko, pa desaroyá mas konsiensia tokante temanan importante pa nos komunidat.

4) Integridat den akshon For di kuminsamentu tabata un di mi prioridatnan ku mester perkurá pa gobièrnu skohe pa e kaminda korekto pa kumpli ku su metanan: esta ku ta kumpli ku lei i ku balornan general di desensia i ‘fasun’. Den lus di esaki, mi a inisiá e proyekto integridat, ku e intenshon pa promové integridat den gobernashon. E proyekto ta dirigí riba 3 nivel, esta e nivel di pueblo, nivel di e organisashon gubernamental i e nivel di gobièrnu. Pa duna un empuhe na e tema di integridat pa loke ta trata e nivel di organisashon. Segun Emerencia, siman pasa, mi a tuma e inisiativa pa organisá un asina yamá Dia di Integridat, kual a enfoká riba e tema di vulnerabilidat.

5) Liderazgo servisial E di sinku punta di lansa tabata: ’liderazgo servisial’: esta ku semper bai mi trabou lo mester ta dirigí riba duna apoyo na servisio di pueblo. Kumpliendo Ku Mi Trabou Durante e dos aña ku mi a fungi komo Gezaghebber mi a trata pa kumpli ku e 5 puntonan aki. Nan a fungi komo prinsipionan, komo liñanan kòrá, ku a yudami ku den desishonnan ku mi mester a tuma kada dia. Mi a topa situashonnan unda mi por skohe pa bira kara mira otro banda, òf tuma posishon i akshon dirigí riba korekshon. Mi a topa situashonnan unda mi por a skohe pa e kuminda fásil (‘de weg van de minste weerstand’), òf skohe pa e kaminda difísil pero alabes e kaminda ku ta ofresé solushonnan mas duradero. Mi por a skohe pa komplasé deseo di sierto persona, òf pa komplasé ku lei, balornan i prinsipio. Mi por a skohe entre baha kabes pa preshon i intimidashon I hiba un bida ‘sin problema’, òf pa resistí preshon I intimidashon I karga e konsekuensia. Mi por a skohe pa keda ketu, òf skohe pa rekonosé i respetá mi propio opinion i mi konsenshi. Mi por a skohe pa laga miedo i kobardia dominá mi aktonan òf skohe pa laga fe i speransa determiná mi pasonan. Momentonan difísil Tabatin momentonan difísil: e desishonnan relashoná ku e órden di emergensia Curoil, e desishon pa entamá e investigashon na WEB tokante bon gobernashon, e desishon pa entrega e keho na Ministerio Públiko relashoná ku e permisio di taksi, tur tabata desishonnan hopi difísil, pasobra nan tabata desishonnan ku a kousa hopi resistensia kontra mi persona. Tambe mester rekonosé ku Boneiru por ta chikitu, pero ku tòg goberná na e isla aki ta algu kompliká. Tin hopi responsabilidat pa kumpli kuné, un isla ku un aeropuerto internashonal, ku 5 haf, ku kompanianan importante manera BPEC, Curoil etc. Un isla ku tin masha hopi faseta di seguridat ku mester kuida na mihó manera posibel pa garantisá ku pueblo di Boneiru por traha, biba i rekreá na manera sano si sigur. Tur esaki ta duna Gezaghebber responsabilidat èkstra i pisa pa vigilá, supervis’é i mantené kumplimentu ku lei. E tareanan aki ta hasi ku no ta semper desishonnan ku un Gezaghebber tuma ta kai den bon tera serka tur hende. Pero, esei ta e tarea di un Gezaghebber I e mester kumpli ku esaki. E funshon di Gezaghebber: un funshon responsabel, b unita i noble Pero no ta e momentonan difísil aki a karakterisá henter e trabou di 2 aña komo Gezaghebber. Mas ku tur kos lo dominá den mi rekuerdo e eksperienshanan presioso i balioso. Mi ta menshoná entre otro e organisashon di e Weganan di Rei, e aktividat pa risibí e pareha Real, e Dia di Felisidat: nan tur tabata momentonan hopi bunita ku nos por a papia tokante felisidat den nos komunidat. E sita ku pueblo di tur siman, den kua nos tabata trata petishonnan di pueblo i ku a duna mi e oportunidat di topa habitantenan personalmente. E diferente grupo di trabou ku kende mi a eksperimentá un profesionalismo i étika di trabou haltu i ehemplar: e komishon di konseho Curoil, e komishon ku a konsehá pa loke ta trata e tema di ”Pachi’s Place: tabata un gran honor di a traha ku boso.

E motibunan di mi retiro Lo tin hende ku ta puntra nan mes pakiko mi a tuma mi retiro. E motibu ta pasobra mi no por konta mas ku apoyo i sosten di gobièrnu di Boneiru pa i maneho. Ta duel mi inmensamente ku apénas 3 luna despues ku a firma na Aruba un akuerdo ku nos lo a trata pa goberná Boneiru na manera harmonioso, ku konseho Insular, den mayoria, a disidí di pasa tòg un moshon di deskonfiansa kontra mi persona. Den esaki, gobièrnu di Boneiru a kibra e konfiansa ku mi persona komo gezaghebber mester tin den un gobièrnu, pasobra e gezaghebber mester di e apoyo di gobièrnu, si no e no por hasi su trabou. Mi ta enfatisá ku mi ta rechasá e kontenido di e moshon riba tur punto: mi no ta rekonosé mi mes den e akusashonnan i den mi opinion e akusashonnan ta sin base i vários di nan ta basa riba falta di konosementu di lei. E hecho ku ya ta di dos gezaghebber ku ta baha asina lihé tras di otro, ta algu ku ta duna di pensa pa loke ta trata e posibilidat ku un gezaghebber ta haña di gobièrnu pa e por hasi su trabou. Satisfakshon i gratitut Asina mes, mi ta mira bek riba 2 aña ku satisfakshon i gratitut. E tabata sin mas un eksperiensha ku pa nada di mundu mi lo kier a pèrdè. Mi ta bisa un danki di kurason pa tur esnan ku ken mi a koperá den e último 2 aña: na Kolegio Ehekutivo, Konseho Insular, driehoek, direktoradonan, brantwer, kompanianan di gobièrnu, agensianan di RCN, organisashonnan no gubernamental, sektor priva i pueblo en general. Un danki tambe na e ministerionan di Hulanda i su liasonnan na Boneiru pa un bon koperashon. Un danki ku boso a permití mi ta boso gezaghebber den e 2 añanan ku a pasa. Un palabra special ta bai na e miembronan di Kabinet di Gezaghebber: Roella, Treesje, Raquel, Bella i Fransje I tambe Joel i Ricardo pa e apoyo ku semper mi por a konta riba dje. Un danki na tur ámtenar pa e apoyo ku boso ta duna na gobernashon di Boneiru: boso ta e pilar ku gobernashon ta dependé di dje. Finalisando, mi ta deseá sr. Edison Rijna tur klase di éksito den e trabou bunita di Gezaghebber. sr Rijna. E por konta riba mi apoyo. Pueblo di Boneiru, tabata un privilegio pa traha pa boso. FileTico Janga D://persberichten/algemeen/2014/