Seniorenteams De Sjter in mineur; Vets belaeve geweldige jubileum-activiteit

Rudi Völler en Frank Rijkaard make opwachting op feest bie de Poart! Stef

Conjour winnaar van gouwe sjoon veteranen!

De resultaten op ut veldj woare dit weekend absoluut neit om euver noa hoes te sjrieve. Os

eesjte elftal ging in unne oetermate belabberde wedsjtried ten onger in Genhout (2-1). Ut

tweede goof unne 3-0 veursjprong oet henj taege Caesar 2 en moosj genoegen numme mit

un punt (3-3). Ut driede verloor nipt mit 4-3 bie Gelaen-Zuid 3. De mannen van 4 deige ut

qua oetsjlaag nog minder goud taege Eijsden 4 (1-4). Normaliter waere dat soort resultaten

nog verbloemd door un aafgeteikende euverwinning van de veteranen. Dit weekend houwe

die echter geine wedsjtried op ut programma, vanwaege un geweldig jubileumfees.

Gelukkig zurgden de dames toch nog veur unne driepunter door oet mit 1-2 aaf te raekene

mit de dames van Heythuysen.

Gelukkig is d’r in ut randjgebeure waal waer genog leuks te deile. En ich zegk uch al veuraaf:

ut is dees waek un langk versjlaag. Maar ut is zeker de muijte waert. Dus effe doorbiete

allemoal en geer zult riekelijk beloond waere!

Allereesj leverde ut feeske van de vets vanzelfsjpraekend waer de neudige quotes en

verhoale op. Maar auch ut verjoardaagsfeeske van De Sjter 3-sjpeler Brian Nitsch en auwt

Sjter-sjpeler Nick Kohlen bie De Poart leverde goei foto’s en verhoale op. Mit es oetsjeiter

de verzoening tusje Frank Rijkaard en Rudi Völler.

Wiejer nuujts euver de apaarte kramp-aanval van Luc Spaans en un aantrekkelijke vacature

bie de nuuj club van Ronny Czornyj. En tot sjlot nog opheldering euver unne teaser rondjom

Marco Vaassen dae veurige waek waal woort benuimp maar dae neit nader woort

toegelicht. Loate veer dus maar sjnel beginne.

En dat doon veer dees waek bie de wedsjtried van os eesjte elftal. Dat team opereert dit

sezoen beheurlijk wisselvallig. Op zich veel dat waal te verwachte natuurlijk aangezeen

sjtabiele krachten wie Guido Cals, Paolo di Lernia en Ricardo Lucassen wegvele noa

aafgeloupe sezoen. Van de angere kantj wees un oetermate positieve en succesvolle

veurbereidings- en baekercampagne d’r op dat ut auch in de huidige samensjtelling van de

selectie geweun prima moosj kenne. De nuuj jonges lete unne positieve indruk achter en

Jean Maas toonde aan dat hae es coach prima wis in te sjpele op de krach van zien eige

team en de zjwaakte bie de taegesjtenjers.

Noa unne houpvolle sjtart is ut team echter belandj in un mindere fase. Woar de nederlaag

taege Veritas nog te wijten aan ein zjwake fase in unne wiejere prima wedsjtried, maar in de

doa op volgende nederlaag taege LHC hoalden geweun te veul sjpelers un onvoldoende.

Aafgeloupe weekend dus zaak om in Genhout waer unne positieve doorsjtart te make.

Coach Maas houw zien elftal licht gewijzigd. Timo Haberland verving ziene brouer Mike op

ut middenveldj en Stan Goossens en Davy Hodselmans wisselden in de as van positie. De

opsjtelling zoog d’r dus es volgt oet:

Kis: Geoffrey

Achter: Roel, Guido, Davy en Randy

Midden: Timo, Stan en Bob

Veur: Thijs, Maarten en Giel

Bank: Mike, Hassan en Marko

De tactiek van GSV woar al sjnel dudelijk. Men wol De Sjter neit loate opboewe en

verplichten sjnel de lange bal te sjpele. En op momenten dat os jonges dan toch tot

voetballe kome, woort d’r door de mannen van Genhout fel druk gezat op de bal. Gepaard

mit un supersjnel kunstgraasveldj door de raege, zurgde dat veur un beheurlijk groot hots-

knots-begonia gehalte bie beide plouge de eesjte helf.

En hoewel ut sjpel van de gael-zjwarten neit geweldig woar, kreeg men toch kansen. De

eesjte woar veur Thijs, dae vanaaf rechs binne de 16 unne bal op de volley noom, dae mit

un ultieme reflex door de de GSV-keeper woort gered. Noa un hauf oer sjpele wis Giel de bal

mit un sliding nog net tot bie Thijs te kriege. Dae zoog ziene inzet gesjtop waere door de

keeper wonoa de rebound van Maarten van de lien woort gehoald. Wiejer koom ut

doelgevoar veural vanoet dooie sjpelmomenten. Zo sjprong Bob prachtig hoog op om unne

vrieje trap van Stan binne te kuppe, maar kreeg hae de bal helaas houf op ziene sjouwer. En

auch Davy wis unne vrieje trap van Stan net te hoog achteroet door te kuppe, wodoor de bal

sjus euver ging.

Esse dat zo leus, dan liek ut mesjiens nog heel get, die eesjte helf. Maar om heel eerlijk te

zeen woar ut voetballe weinig hoogstaand van beide plouge. Noe vult doa op zich nog mit te

laeve maar wat veul ergerlijke woar, woar ut onophoudelijke zeike en moele en sjreeuwe

van beide plouge. Richting grensrechters, richting de sjeidsrechter, richting taegesjtenjers

en richting ploeggenoten. Ech jonges, sjei doa esteblijf mit oet want ut levert niks op en ut is

versjrikkelijk om aan te heure langs de kantj.

De tweede helf woar aanvankelijk meer van utzelfde. En opnuuj woar ut De Sjter dat de

eesjte kans kreeg. Unne veurzet van Giel koom bie Thijs dae de bal nog knap mit unne hauve

omhoal op goal kreeg. De bal ging langs de keeper maar koosj door de GSV libero van de lien

waere gehoald.

In de fase die volgde kreeg GSV inens un paar goei kansen en helaas… die woorte auch nog

benut. Vanoet GSV perspectief twee prima oetgesjpeelde goale. En zo keke os jonges taege

unne 2-0 achtersjtandj aan noa un oer sjpele. De rugk woort gerecht en gelukkig woort al

sjnel de aansjleitingstreffer gescoord. Ut woar Giel dae prima doorzette en zo Thijs in sjtoat

sjtelde om unne perfecte deiptepass te gaeve op Bob. Dae bleef rustig en ronjde bekwaam

aaf in de lange houk veur de 2-1!

Echte kansen op meer zeen d’r de letste 20 minute helaas neit gewaes. Giel probeerde ut

unne keer mit unne sjieke dropkick, maar de GSV keeper wis dae bal nog net te keren. En

wiet op ut lets woar d’r nog unne kupbal van Davy (dae in mien auge es einige un voldoende

scoorde) dae sjus euver ging. Wiejer beperkte ut sjpel zich tot kansloze lange ballen die noa

veure woorte gepomp wo ut defensieve centrum van GSV jeder kupduel won. Gebrek aan

inzet kent nemes verweten waere, maar ut echte geluif in un goud resultaat leek auch te

ontbraeke. Dieptepunt woar vervolges nog de oliedomme rooj kaart van Bob dae de GSV

keeper raakte in ut doorloupe.

Volgende waek sjteit d’r veur os eesjte unne baekerwedsjtried taege Roosteren op ut

programma. Op papier un oetgelaeze muigelijkheid om waer get zelfvertroewe te tanken en

unne sjtart te make aan un nuuj goei serie. De zomermoanje hubbe immers aangetoond dat

die kwaliteit waal in de selectie zit. Kommende waek effe allemoal in de sjpeigel kieke en

concludere dat geer zelf twee waeke achterein onger de moat woort (wat euveriges bes

moag) en dat ut neit aan sjeidsrechters, taegesjtenjers of ploeggenoten ligk. Dan is dat

hoapelijk de basis veur un succesvol vervolg van de competitie. Kom op mannen!

Van os eesjte elftal sjakele veer euver noa ozze dames. Die moosjten oet in Heythuysen

voetballe. Tot noe toe woar ut ummer Jill Janssen die netjes un versjlaag van de wedsjtried

aanleverde. Doa koom dees waek echter verangering in. Jill koosj zelf neit aanwezig zeen.

De reje is mich neit bekend. Wat mich waal bekend is, is dat ze vriedig, zoaterdig en zondig

gezellig in de café’s aanwezig woar:

Gelukkig houw Jill de meest welbesjpraakte binne ut team benaderd om de taak van heur

euver te numme. En dus ontving ich aafgeloupe moandig dit appje:

Dat woar nog ens un sjieke verrassing. Want Gerard acteert weliswoar bie de veteranen

vaak de ietwat bote boer, maar dat hae kent sjrieve, is bie de vets algemein bekend. Gerard

woar immers ruum un joar geleje (vlak noadat de porno-escapades van Will Leurs veur ut

eesj aan ut leich kome) verantwoordelijk veur un gedicht dat Toon Hermans noa de kroon

sjtik. Hoewel ut al ens gepubliceerd is, wul ich dat gedicht mit plezeier nog ens in

herinnering brenge:

En auch dit keer sjtelde Gerards literaire oetsjpatting, in de vorm van un versjlaag van de

wedsjtried van ozze dames, neit teleur:

Zondigmurrege woar het dan zwa wiet. Om hauf neuge druppelden de vrouwluuj van het

dameselftal fris en fruitig bie het Hetje noa benne. Enkele dames woare neet aanwezig zwa

wie Boellie, die zoat in de AA kliniek of bie bureau Halt, Manon Q woar noa 8 joar eindelijk

heur huwelijkse plichten aan het noakommen, Jil J woar Roel H op sjerp aan het zette veur

zien match op zonjigmiddig.

Dan woare er nog enkele speeltsters mit blessures en ziekjes, maar doa stong tegeneuver

dat Marwa H noa moanje afwezigheid, truuk woar gekeerd oet IS gebied en in

trainingskloffie en ein bitje opgemaakt op het Hetje aanwezig woar. Jil V woar

zaoterdigoavend om hauf tjen al noa bed gegange en hauw eine maagdelijke nacht beleafd

zwa dat ze fris aan de wedstried kos beginne. Wie ederein aanwezig woar kos weare

aafgereis noa Heythuizen wo om 10.00 oer de aaftrap zou plaats venje. De dames begoste

mit de volgende opstelling:

Kis: Maartje (Dasajev)

Achter:Yael B vanaf noe Charel genumd (is beater oet te spreake), Dyonne C (maliboe), Jill V,

Shauni M (jenneketrien)

Midden: Samantha V oftewaal Polski, Siri. V, Nikki R en Cindy P (Nel)

Veur: Bo Knoops/vanKan/Crutzen en Joy C

Reservebank: Marwa vande IS en Rachelle v.E (greenmachine)

De wedstrijd begos gezeen vanoet De Ster zeer slapjes wat resulteerde in enkele fantastische

reddingen van onze keepster. Nadat Kiki R haar stemgeluid gelijk Willy Worms over het veld

liet schallen herpakten onze dames zich en onder aanvoering van Nikki R werden de Dames

steeds beater. Dit resulteerde dan ook in de zeer verdiende 1-0 veursprong van os Dames.

Enkele minuten later gevolgd door ein sjwan actie op links van Joy C die de bal strak veur

goof en Bo de 2-0 kos loaten aanteikenen. Dees goalen vele enkele minuten veur de rus.

Onger rus woar Samantha Polski droet gehoald, Shauni ging rechts hauf voetballe en

Rachelle ging linksback spele. De teagestenjer kreeg bienoa gein kans, het woar zwa erg dat

ein maedje van Heythuizen door de inspanningen meus kotsen, woa op Marwa IS zeat,(die

zal het gezich waal van Dyonne hubbe gezeen dat die mot kotsen), dus humor genog op de

bank. Volges Marwa kos ste ouch neet het verschil zin tusje de Sjeids en Joy C. Ze bedoelde

de huidskleur. Enkele onachtzaamheden en gestuntel van Cindy (Nel) en sommige angere

woare de oorzaak dat Heythuizen kos teage score.

Al mit al hubbe de dames deze pot verdeend gewonne, en men zuut mit de weak meer de

hand van de trainers truuk in het spel van de Dames, steeds beaterder!!!!

Noa aafloup heat Marwa nog enkele foto’s genomme van het G3 team van Heythuizen, ze

zoag heur geliekenis bie sommige spelers.

Op noa volgende weak!

Gerard, woort noa ut toesjture van dit versjlaag, uiteraard bedank veur zien insjpanning.

Hae antjwoordde doa ietwat mysterieus op. De sjriever van dit sjtuk dach doa in un

verwiezing noa Willem Thewissen te laeze, maar zoot bliekbaar d’r naeve:

Proficiat mit de euverwinning dames. En un extra proficiat in de richting van Yaël Beaujean,

die aafgeloupe waek terech woort oetgeroupe tot Woman of the Match op de facebook-

pagina van De Sjter. En dan woar Yaël auch nog ens op zondig aanwezig in Genhout om de

mannen van 1 aan te moedigen (en heure nonk Patrick Smeets get rustig te haute). Doe bes

unne kanjer, Yaël!

Van de dames goan veer door noa de mannen van 2. Die moosjten thoes aantraeje veur

unne derby taege Caesar 2. Doordewaeks houwe ze unne joarige in hun midde. Dae woort

gehuldigd mit un foto, die sinds kort auch fungeert es profielfoto van de groepsapp van 2:

Jari Knoops deit versjlaag van de wedsjtried:

Vandaag sting de derby teage die van Beak op ’t programma. Noa 2 keer puntverlees op riej

werd t tied veur ein euverwinning! Teage Caesar is ’t traditioneel moeilijk voetballen en die

jonges geave ummer 110% teage os. Dus ver wiste wat os te doon sting, es team erop knalle

en de 3 punten in Stein hauwe.

De trainers hejje ein verrassende opstilling oet de hoge hoed getouverd. Wie ver speelde

geaf ich neet pries want alle teagestenjers leaze dit verslaag hahaha.

Kis: Bastiaan

Achter: Frusj, Jari, Cyrill en Sevn

Midden: Joep, Luc, Bart en Marko

Veur: Hoessein en Steve.

Bank: Kenny, Luca, Jesse en Anass (2 a spelers)

Vlag: Good-old Roy van Mölken

Ver begooste heel good aan de wedstrijd, leete t belke good loupe en creëerde ein aantal

gooj kansen. Echter noa 20 minuten woar de grootste kans te noteren veur Caesar, maar

gelukkig sjoot de spits de bal op de poal.

Heinoa beloonde ver os eindelijk en koame ver verdeend op 1-0 door Luc Spaans. Ein aantal

minuten later waor t weer pries. Eerst vlagde Roy heel sterk op ein oetbraak van Caesar. In

de opvolgende aanval van os leek Steve boetespel te stoan, allein wirkt hunne grens

doordeweaks al op ’t vliegveld wodoor er in ’t weekend geine zin heat om te vlaggen.

Steve brook door en speelde aaf op de inmiddels veur Hoessein ingevallen (hamstring) Luca,

2-0 ! Weer ein paar minuten later kreeg De Ster eine terechte penalty dea Luc feilloos benne

sjoot, 3-0 !

Lekker oetvoetballe tot de rust waor t motto, mer in de litste seconde ging t mis. Eine vrieje

trap van hun koam bie eine volledig vriestaonde speler van hun de benne sjoot, 3-1…

In de rust werd dan auch virtild dat ver veul beater waore en dat ver geweun mooste blieve

voetballen. “Snitch” in hart en nieren Timo koam virtille dat Caesar 1-op-1 ging spelen. Dat

beteikent dat er meer ruimte koam en dat ver achter kort erop mooste zitte.

Echter noa rust kregen ver metein 3 gooj kansen op de 4-1, mer hienoa werd er paniek

voetbal gespeeld door os 2e. Edere bal werd langk gegeave en die koame eave hel teruk. Ver

waore gein schim meer van oszelf en auch edere 2e bal werd verloare. Caesar koam dan

auch op 3-2… Hienoa veel eine speler van hun zelfs oet wodoor ze mit 10 stinge. En zelfs toen

ging t nog mis, via de kluts veel de 3-3.

Hienoa hubbe ver nog alles geprobeerd mer t wou gewoon neet meer lukke vandaag. Flink

balen en echt 2 punten loate ligge vandaag. Volgende weak Venlosche Boys oet, bin benuud

wie veul luuj nuchter aan de aaftrap versjiene de daag noa 11-11 hahaha.

Jari, bedank veur dien versjlaag. En maak dich neit te druk euver volgende waek. Ut sjient

dat ut kommende zoaterdig auch in Venlo 11-11 is en dat ze doa auch van beier haute. Ut

vilt te hoape dat Luc Spaans kommende waek zien vorm en ziene inzet van aafgeloupe

weekend doortrek. Luc leep zich immers kapot taege Caesar. Dat leverde ‘m weliswoar 2

goale op maar auch unne kramp-aanval un oer noa de wedsjtried, op de parkeerplaatsj van

Genhout, wo hae noa 1 ging kieke. Gelukkig woare zien mitgereje medesjpelers bereid om

de kramp effe d’r oet de massere en duuje… vlak noadat ze un foto veur dit versjlaag houwe

gemaak uiteraard:

Van ut tweede sjakele veer euver noa os driede elftal. Dat sjteit onger leiding van coach

Rene Gooren en grensrechter Marco Vaassen. En doamit hubbe ze mich twee sjieke biejein.

Eesjgenuimde maakte aafgeloupe vriedig furore es DJ op ut verjoardaagsfeeske van Brian

Nitsch en Nick Kohlen. Dat furore maken deig Rene euveriges same mit Tom de Keul:

En Marco Vaassen… tja, dae kump frequent terugk in dees versjlage. Zo frequent dat ’t luuj

zelfs opvilt es ‘r unne keer neit d’r in veur kump. Dit keer dreijt ut om ut feit dat Marco in ’t

huwelijksbootje geit sjtappe. Althans, dat leek Marco zelf te suggereren, wie hae dees foto

insjtuurde:

M hartje D. Dat zat de sjriever van dit sjtuk aan ut denke:

Noe ben ich toch waal nuujsjerig wae die mysterieuze (dubbel)D is. Suggesties zeen

uiteraard welkom.

Rene en Marco moosjten mit hun mannen van 3 voetballe taege Gelaen Zuid 3. Rene deit

versjlaag van de wedsjtried:

Ut driede speelde een mindere eerste helft in Gelaen mer ondanks dat kreege vr toch get

kansen, en oet eene schitterende aanval via Roel van de Heuvel en Marco “supersjeng”

Verhoeven scoorde Tim Giebels de 0-1.

Helaas ginge vr rusten mit unne 2-1 achterstendj. In de tweede helft woar ut baetere van ut

spel veur os en koam gelaen dr allein nog mer oet via de lange bal. Doa veel helaas auch de

3-1 oet. De kansen veur os kome echter en vr geluifden in eene gooje aaflaup. Marco

verdeende eene pingel noa een goeie actie en Rene maakte alweer ziene 4e dit seizoen

vanaaf de stip: 3-2.

Bart Pantus wilde auch nog op ut scoreformulier komme, maar helaas veur de verkeerde

ploog: 4-2. Direct doanoa maakt Maikel Melis de anschliesungstor maar dat mocht neet

meer baten. De engelse sjeids dae prima floot maade dr een einde aan. Eene lekkere

wedsjtried wo alles inzoat mer helaas gein resultaat veur os.

Klasse bezig, mannen van 3. De resultaten zeen ut ganse sezoen al prima en es ut dan toch

unne keer taegezit qua oetsjlaag dan is ut sjpel in jeder geval hoapgaevend. Om Barry

Stevens in de soundmixshow te quoten: “Vooral doorgaan!”

Dan goan veer door noa os veerde elftal. Die moosjten thoes sjpele taege VV Eijsden 4.

Ralph Doek deit versjlaag en is genadeloos wie ummer:

De opsjtelling weit ich neet mjea maar ’t woar niks van eene wedstrijd dus dan maak dat

auch gein klwoate oet. Enigste grwoate aafwezigen woare (Raoul) Dasse en Ivo (van den

Bergh). Dasse heij aan de veurige wedsjtrijd get gekneusde rubbe euvergehoute en Ivo hej

nog get las van zien gebroake gezich.

Ondanks dat ver de nuuje truitjes heije en ‘strak in ’t pak’ op ut veld stinge (truitjes valle geit

klein oet veur un ljaeger elftal) leep ut neet zwoa wie trainer Jansse in gedachte hej…

balverlees, miscommunicatie, en sjeldpartieje wisselden zich aaf wodoor ver noa een hauf

oer mit 0-2 achter stinge. Ich sting op ut veld maar van langs de kant mot ut nog

belabberder hubbe oetgezeen.

In de rus hej ver besloate dat ver neet mjae op ein ginge sjelle en dr ut beste van te make.

Ver speelden un stuk baeter en de kanse op 1-2 en 2-2 woare dr waal degelijk. Helaas

woorte die gemis en leep Eijsden op de counter oet noa 0-4.

Jenki Jevric (ein van de weinige mit een voldoende) redde in de letste minuut nog de eer door

1-4 binne te sjeete. De zuus waal, ’t kent neet eder weekend fjaes zeen… dus kommend

weekend is ’t weer fjaes!

Of Ralph Doek mit die letste zin doelt op de 11e van de 11e of op un euverwinning veur de

mannen van 4 is neit gans dudelijk. De troewe laezers van dit versjlaag hoape natuurlijk op

zowel sjoon foto’s van die zate köpkes op zoaterdig, en op unne driepunter op zondig. Kom

op mannen!

Tja, en dan res os nog maar ein elftal te besjpraeke. Dat is un elftal dat neit ens voetbalde

dit weekend, maar wo desondanks waer ruumsjoots aandacht aan wurt besjteed: ozze

veteranen. Die vieren namelijk dit joar hun 50-joarig besjtoan. Eerder woort doa al unne

feestoavend veur de ganse vereiniging aan gewijd. Maar aafgeloupe zoaterdig woort d’r in

besjloate kring nog ens bie sjtilgesjtange op unne fantastische feestoavend, georganiseerd

door de feestcommissie besjtoande oet John Jacobs, Jos Driessen en Mat Cremers. De

plannen woare door die commissie angstvallig geheim gehaute. En dus woar d’r veuraaf get

ondudelijkheid. Denny Vorstermans vroog om opheldering en kreeg bieval van luuj die Mat

Cremers nog effe wolle ploage om de ondudelijkheid of de kinjer auch mochte komme (wat

dus neit ut geval woar):

Mat Cremers goof names de feestcommissie opheldering euver de dresscode maar heel de

res geheim. Dat leidde tot argwaan bie Ron Marchal:

Op zoaterdigmurge koom Ron nog effe terugk op ut verzuik dat Mat aan de vets houw

gedoan:

Dat klonk prima. Al woort die letste bewaering welgeteld 10 minute later alwaer ongeroet

gehoald door Denny:

Omsjtreeks 4 oer in de middig verzamelden de vets zich, mit partner, bie de feestlocatie:

café Jacobs, oftewel Bie Lies op de Berg. Dat café woar veur eine oavend omgeduip:

In verbrasserie Chez Lies Sur la Montagne woorte alle geneudigden ontvange door de

feestcommissie:

Mat, John en Jos zoge d’r natuurlijk geweldig oet, al dachten sommige veteranen doa angesj

euver. Mat Caanen bekeek zich die drie ens bie binnekomst en vroog: “Is dit un homo-tent?”

Alle veteranen kregen zonne gaele sjerp omgehange, dae geer op de foto zuut. En doanoa

zoch jederein zich un plaetsjke op. Doabie kreeg coach Leon Fredrix nog effe unne verbale

sjtaek van Marc Lacroix.

Will Leurs: “Is d’r gein toafelsjikking?”

Marc Lacroix: “Normaal hubbe veer toch auch neit veul van un opsjtelling?”

Roger Daemen: “Wat is ut trouwes druk man!”

Ron Marchal: “Es ut tied vraete is dan kriege veer de men waal biejein.”

Aan toafel woare de gesjprekken geliek van hoog niveau. Zo sjprook Roger Daemen ziene

vrundj Will Leurs aan.

Roger: “Will wo is Mia?”

Will: “Die koosj neit komme, jong.“

Roger: “Die is noe zeker porno aan ut kieke thoes.”

De aanwezige dames keken ens rondj en verbaasden zich bie de aanblik van dit zooitje

ongeregeld d’r euver dat de vets van De Sjter toch bes vaak hun wedsjtrieje winne. Roger

Damen hoakte doa nog effe op in.

Roger: “En es veer vandaag gesjpeeld houwe, dan houwe veer auch waer gewonne…

tenminste… doe zouws toch neit mitgedoan hubbe, he Will?”

Wie jederein un plaetsjke houw gevonje in ut fantastisch aangekleide café noom eesj

veteranen veurzitter Rene Hillen ’t woord. Dae vertelde un prachtig verhoal euver 50 joar

Sjter veteranen. Doabie kreeg Will Leurs euveriges auch waer unne neksjlaag vanoet de zaal.

Rene: “De gelegenheid vandaag is ut 50-joarig besjoansfees van de veteranen. 1967… toen

woar nog geine van uch d’rbie.”

Roger: “Will Leurs auch neit?”

Rene begoosj doanoa aan un opsomming van allemoal gebeurtenissen oet ut joar 1967. D’r

kome un paar dinger veurbie die reacties in de zaal opleverden.

Rene: “D’r koom in 1967 veur ut eesj un vrouw naaksj op tillevisie. Phil Bloom bie de VPRO.

Ronny zoot toen es 2-joarige al veur de tv.”

Ron: “Toen hub ich inderdaad ut beeld aafgelek.”

Rene: “Louis de Funes woar toen populair op tv. Die filmkes mot ich trouwes nog ummer

jeder weekend kieke omdat mien vrouw ze ummer blif opzette.”

Ron: “Sjnapse ‘m noe waal?”

En noa un wurkelijk geweldige speech, wo hae terech un applaus veur kreeg, goof Rene ut

woord door aan unne man dae nogal lang van sjtof kent zeen. Doa woort Roger d’n Doam

get nerveus van.

Rene: “Dan gaef ich noe ut woord aan Matje.”

Roger: “Kenne veer neit eesj get aete?”

Maar Mat leet zich neit van de wies brenge en ging wie unne veldheer veur zien troepen

sjtoan:

Mat begoosj zien speech mit un vroag, die geliek reacties opreep.

Mat: “Zondaars, mannen… zijn wij niet allemaal zondaars?”

Ron: “Sommigen hie get meer es angere, Mat.”

Misha: “Namen, Matje, Namen!”

Mat ging wiejer mit zien betoog en goof toe dat de feestcommissie un aantal fouten houw

gemaak de veurbieje joare. Zo woar de bezurging van de blauwe kostume beheurlijk

vertraag. En auch de beloafde VIP-kaertjes veur MVV-Fortuna woare oetgebleve. Mat sjtook

de hand in eigen boezem, reep de angere leje van de feestcommissie auch noa veure en

ging toen wiejer mit zien sjuldbekentenis (die waer ens bevestigde dat Mat redelijk

dictatoriaal de scepter zjwejt binne die commissie):

Mat: “En doarom hubbe veer same besjloate… of ja, zie weite dat eigenlijk nog neit… maar

in jeder geval goan veer os functioneren ter discussie sjtelle tiedes de joarvergadering en

aanvaarden veer eventuele consequenties.”

Vervolges ging Mat door mit ut onttronen van Veronique es veteranen-keuningin. Om

vervolges aan un verhoal te beginne euver de nuuj keuningin. Of eigenlijk… de nuuj keizerin.

Want bie un 50-joarig jubileum paste volges Mat un opwaardering van dae titel. Mat

verhoalde euver de twee grootste keizerinnen oet de oudheid. Eesj un gans verhoal euver

Livia Drusilla (die nemes kent en van wae ich de naam heus neit onthaute houw, maar die

waal mekkelijk te achterhoale woar toen ich, sjus wie Mat, “invloedrijke keizerinnen” op

google intypte en dae naam es eesjte kreeg). En doanoa euver Cleopatra. En Mat vonj dat

de nuuj keizerin auch trekken van Cleopatra moosj hubbe. Mit ein oetzunjering…

Mat: “Cleopatra haet oeteindelijk zelfmoord gepleeg. Ze haet zich door un giftige sjlang in

heur borsten loate biete… Dat goan veer bie ós nuuj keizerin die sjlang neit aandoon. Want

bie deze roupe veer Véronique oet tot keizerin van de veteranen.”

Doanoa woar ut tied om te aete en dat woar ech sjmulle. Perfect gekoak door John en Jos.

Hulde mannen!

Noa ut aete ging de ganse sjtoet te vout op noa Café de Bekker. Al woort d’r eesj unne

tusjesjtop gemaak bie ut hoes van de joarige Graad Smeets. Dae woar zo vrunjtelijk om ’t

raemke van de deur oape te make om ut gezang en de felicitaties in ontvangst te numme:

Noa boete komme zoot d’r echte neit in bie Graad. Maar die besjeijenheid pas auch waal bie

‘m. In de groepsapp woar doa auch niks dan respect veur:

Doanoa woar ut op noa Tillie van de Bekker. Doa woarte de neudige pinten gepak, gezellig

verteld en… druk gelobbyd door de feestcommissie om opvolgers te zuike. Noa un paar

uurkes moosj de ganse sjtoet door noa De Poart veur ut volgende officiële gedeilte. Want

doa woort de Graad Smeets zeiver-award oetgereik. Favoriet bie de bookmakers, Gerard

Martens, woar neit komme opdagen en maakte dus gein kans. En dus woort de pries (un

prachtige sjoal) volkomme terech oetgereik aan Ron Marchal!

Welgeteld 24 oer later woar d’r echter al paniek bie Ron rondjom de gewonne pries:

Peter Janssen en Roger Daemen woorte benuimp es hoofdverdachten. Roger ontkende

geliek en deig dat volges Ron op un bezunjer geluifwaardige maneier:

En auch Peter Janssen ontkende en verwees noa unne angere verdachte (dae euveriges neit

ens aanwezig woar). Dae ontkende en deig ’t veurkomme esof hae zien rol es coach van de

dames enorm serieus noom. Doa woorte geliek vroagteikes bie geplaatsj:

Ron bewaerde vervolges dat dit misdrief de internationale media al gehoald houw. Alle

grote kanalen houwe d’r aandacht aan besjteed en daezelfde oavend nog zou ’t besjproake

waere in Opsporing Verzocht. En unne blik op de website van dat programma bewees dat

Ron niks geloage houw:

Oeteindelijk meldde de dader zich zelf. Ut bleek toch Roger d’n Doam te zeen dae de trofee

veur eine daag geleend houw om d’r get lekkesj vanaaf te aete:

Maar goud, de vets woare dus gebleve bie de oetreiking van de award aan Ron bie café De

Poart. Van doa oet woort, noa de neudige pinten, waer de waeg terugk richting

verbrassering Chez Lies sur la montagne ingezat veur de oetreiking van de letste award: de

gouwe sjoon. De winnaar van de gouwe sjoon wurt ummer democratisch verkoaze doordat

op de joarvergadering in ’t veurjoar jedere veteraan un sjumbreifke moag invulle. De op dat

moment nog heersende gouwe sjoon-winnaar moag dan un joar langk dat geheim beware

en tiedes de feestdaag onthulle wae de winnaar is.

Heersend gouwe sjoon-winnaar Thijs Otten maakte d’r un sjpannende ontknuiping van.

Maar oeteindelijk maakte hae bekend dat de gouwe sjoon, volkomme terech, woar

gewonne door Stef Conjour, dae mit un flinke dosis humor (en in ut kader van besjeijenheid

siert de mens) opmirkte dat deze eer ‘m al 3 joar te laat te beurt woar gevalle.

Stef maakte auch bekend dat hae, noa ut winne van deze sjoon, euverwoog om te goan

sjtoppe mit voetballe, om meer tied aan zien vrouw te kenne besjteje.

Ron: “Joa doog dát. Want die belt mich gek.”

En zo koom d’r un einde aan waer unne fantastisch veteranenfeeske. Muigelijk gemaak door

de geweldige feestcommissie Jos, John en Mat. Bedank mannen, ut woar super!

De aafsjleiter van dees waek geit oet noa de man dae dit weekend un troanke moosj

wegpinken. Veurig sezoen woar hae nog de winnaar van de felbegeerde gouwe sjoon bie de

veteranen. Aafgeloupe weekend moosj hae dae trofee, noa un joar, aafsjtoan aan ziene

opvolger. Hae heel zich groot, maar ut deig ‘m toch waal un klein bietje pien. En dat moag

auch bes. Un joar langk woar dae trofee veur ‘m un argument om te sjtoppe mit voetballe

bie de vets. “Sjtoppe op dien hoogtepunt” woar ut argument. En “dae pries woar un

pressiemiddel van uch om mich tot sjtoppe te bewaege”. En es die zaken woorte

taegesjproake dan woar ut “mien lichaam is versjlete. Voetballe geit neit meer.”

Un vol joar hubbe veer ‘m noe motte missen es medesjpeler. De man, dae es invaller, in ein

van zien letste wedsjtrieje unne topwedsjtried taege Catsop besjliste mit 2 goale in 3 minute

tied. En veer wulle ‘m zo gaer terug. Terugk es linksback, auch al is ’t maar veur 20 minute.

Dae gouwe sjoon is noe gein argument meer om definitief te sjtoppe. En dat versjlete

lichaam… dat vilt auch reuze mit. Dat concludeerde ich tenminste wie ich dees waek ens de

foto’s op mien tillefoon aan ut opsjone waor:

Wae kent zoepe, op krukke sjtoan, zinge, danse en mit ziene zate kop roeien op de café-

vloer, dae kent auch nog 20 minute voetballe bie de vets. Kom op Thijs, veer wulle waer

geneite van dich op zoaterdigmiddig! Desnoods gaeve veer dich kommend sezoen dae

gouwe sjoon waer terugk!

Pes volgende waek.

Rob Sjulpe